Rannsóknir nýtast í leiðbeiningar gegn miðmætissýkingum
Á dögunum voru gefnar út alþjóðlegar leiðbeiningar á vegum Evrópusamtaka hjarta- og lungnaskurðlækna (European Association for CardioThoracic surgery (EACTS)) um hvernig hægt sé fyrirbyggja og meðhöndla svokallaðar miðmætissýkingar, en þær eru á meðal alvarlegustu sýkinga eftir opnar hjartaaðgerðir. Meðal höfunda þessara leiðbeininga er Tómas Guðbjartsson, hjartaskurðlæknir við Landspítalann og prófessor við Læknadeild Háskóla Íslands
Miðmætissýkingar geta verið lífshættulegar, sérstaklega ef sýkingin breiðir úr sér til í nálæg líffæri og djúpt í bringubeinið. Í Evrópu og N-Ameríku er tíðni þessra sýkinga víðast í kringum 2-4% en hér á landi hefur tíðnin um nokkurra skeið verið undir 1%, og hefur lækkað úr 2,5% á rúmum áratug. Auk þess hefur enginn íslenskur sjúklingur látist úr miðmætissýkingu eftir hjartaðgerð síðan svokölluð sogsvampsmeðferð (negative-pressure suction therapy) var tekin upp hér á landi haustið 2005. Er þá svampi komið fyrir í sárinu og hann tengdur við sog en við þessar aðstæður er vöxtur baktería heftur þar sem þær þola illa neikvæðan þrýsting og sárinu haldið hreinu. Niðurstöður rannsókna á góðum árangri sogsvampsmeðferðar hér á landi hafa verið birtar í erlendum vísindaritum og þær nýttar í doktorsritgerð við Háskóla Íslands.
EACTS eru stærstu samtök hjartaskurðlækna í heiminum en þetta eru fyrstu evrópsku leiðbeiningar um miðmætissýkingar sem gefnar eru út og tók vinnan þrjú ár. Það er viðurkenning fyrir Landspítala og Háskóla Íslands að vísað hafi verið til íslenskra rannsókna við gerð þeirra og að einn af 11 höfundum hafi verið læknir við Landspítala og prófessor við Læknadeild HÍ.
