Tilnefnd til Edduverðlauna

Uppskrift: Lífið eftir dauðann í leikstjórn og framleiðslu Bergþóru Ólafar Björnsdóttur hefur verið tilnefnd til Edduverðlauna í flokki heimildastuttmynda ársins. Bergþóra gerði myndina þegar hún var í ritlistarnámi við Háskóla Íslands og tók valnámskeiðið Skapandi heimildamyndagerð í námsgreininni Hagnýt menningarmiðlun. Bergþóra var 22 ára þegar hún missti árs gamla dóttur sína og myndin er persónuleg saga um hugleiðingar móður sem þarf að finna leið til að halda áfram með lífið eftir það áfall. Bergþóra segist gjarnan spurð að því hvernig henni hafi tekist að halda áfram með lífið og svarið sé í rauninni einfalt: „Það er náttúrulega ekkert annað í boði. En einn lykill að hamingjunni liggur í að njóta litlu hversdagslegu hlutanna. Finna þakklætið í hversdeginum.“ 

Aðspurð segir Bergþóra að námið hafi reynst henni mjög vel í því sköpunarferli sem gerð myndarinnar var. „Nám er í fyrsta lagi frábær vettvangur til að prófa alls konar og leyfa sér að mistakast, prófa þá annað og/eða reyna aftur. Við hugsum líka um verkin okkar sem „verk í vinnslu“ en þannig er minni pressa á að skila inn fullkláruðu „meistaraverki.“ Fullkomnunarárátta býr sennilega í okkur flestum en hún er bara til trafala og nauðsynlegt að losa sig við hana sem fyrst. Á sama tíma lærist það að „setja punktinn“ á verkið sitt og standa með því eins og það er. Námið er einnig mjög fjölbreytt og er rík áhersla lögð á að við nemendur séum öll ólíkir einstaklingar. Það er bæði frelsandi og hvetjandi, því þá skapast rými til að sleppa tökunum á samanburði við aðra nemendur og læra um leið að treysta því að verkið eigi jafn mikið erindi og önnur verk. Við förum líka yfir verk hvors annars og gefum uppbyggilega gagnrýni, þannig skapast traust og tengslanet sem er dýrmætt að eiga í skapandi geira.“