Hagsmunafélagið Ada tilnefnt til norrænna verðlauna 

Ada - Hagsmunafélag kvenna og kynsegin einstaklinga í upplýsingatækni við HÍ er tilnefnt til verðlauna á vegum norrænna samtaka sem vinna að því að auka hlut kvenna í tölvu- og tæknigeiranum. Verðlaunin verða afhent í Osló í nóvember.

Verðlaunin nefnast Nordic Women in Tech Awards og eru veitt árlega á vegum félagasamtakanna WonderCoders sem vinna að því að valdefla og styðja konur sem hyggja á frama í upplýsingatækni. Alls bárust yfir 600 tilnefningar í þá tíu flokka sem verðlaunin ná til en aðeins fimm einstaklingar, félög eða fyrirtæki eru tilnefnd á endanum í hverjum flokki. Ada er tilnefnt fyrir hönd Íslands í flokknum Bandamaður kvenna í tækni (e.  Women in Tech Ally) ásamt Helenu S. Jónsdóttur. Þau sem tilnefnd eru í þessum flokki eru félög eða einstaklingar sem þykja hafa lagt umtalsvert af mörkum til að valdefla konur í tækni á undanliðnum tveimur árum, gengið á undan með góðu fordæmi og unnið að því að auka fjölbreytileika í tækniiðnaðinum.

Árangur hagsmunafélagsins Ada er afar athyglisverður þegar horft er til þess í hversu stuttan tíma það hefur starfað. Félagið var sett á laggirnar haustið 2018 innan Háskóla Íslands en lagðist í dvala í COVID-19-faraldrinum. Það var svo endurvakið af kröftugum hópi kvenna í tölvunarfræði og hugbúnaðarverkfræði haustið 2022 og hefur síðan þá staðið fyrir fjölbreyttum viðburðum og fræðslu sem miða að því að valdefla konur og kynsegin einstaklinga í upplýsingatækni, hvort sem er í námi eða á atvinnumarkaði.

Nafn félagsins, Ada, er sótt í söguna, nánar tiltekið til Ada Lovelace, greifynju og stærðfræðings sem uppi var á fyrri hluta 19. aldar og er talin hafa verið fyrsti forritarinn.

Lærdóms- og fræðslukvöld og Skvísó

Ein af þeim tók þátt í að endurvekja Ada eftir COVID-faraldurinn er tölvunarfræðineminn Saeeda Shafaee, sem er á þriðja ári í tölvunarfræði. Hún gegnir í vetur starfi forseta félagsins en var viðburðastýra í fyrravetur. „Við stóðum fyrir meira en 20 viðburðum í fyrra, þar á meðal fræðslukvöldum sem fyrrverandi varaforseti félagsins, Theresia Mita Erika, stýrði. Þar var m.a. fjallað um ofbeldi í samböndum, boðið upp á fjármálafræðslu fyrir nema og þau sem eru nýkomin út á vinnumarkaðinn og ferilskrárvinnustofur þar sem þátttakendur fengu aðstoð við að setja upp ferilskrá og síðu á LinkedIn, sérstaklega með sumarstörf nemenda í huga,“ segir Saeeda.

Þá stóð ADA einnig fyrir fjölmörgum Skvísóum, vísindaferðum í upplýsingatæknifyrirtæki, með það fyrir augum að kynna kvenkyns stúdentum og kvárum fyrir atvinnumöguleikum í upplýsingatæknigeiranum og efla tengslanet þeirra. Auk þess stóðu Saeeda og Mita fyrir vel heppnaðri vikulangri dagskrá nú í upphafi skólarárs í samstarfi við Ada undir yfirskriftinni Stelpur forrita. Markmið viðburðarins var að kynna áhugasömum konum og kynsegin einstaklingum fyrir töfrum upplýsingatækninnar.