Lista- og menningarhátíð í Hörpu

eftir Agnar Jón Egilsson og Sigfús Sveinbjörn Svanbergsson

Fúsi, aldur og fyrri störf er heimildaleiksýning um Sigfús Sveinbjörn Svanbergsson. Verkið var frumsýnt 17. nóvember 2023 á Litla sviði Borgarleikhússins og var sýnt til haustsins 2024. Í sýningunni fer Fúsi yfir ævi sína og valin atriði úr fjölbreyttu lífi hans eru færð í leik- og söngbúning með aðstoð leikara og söngvara. Fúsi er húmoristi, fótboltaáhugamaður, leikari, söngvari og lífskúnstner sem minnir okkur á að lífið er alltaf þess virði að lifa því þó að stundum sverfi að. Hindranirnar í lífi Fúsa hafa eflt hann og hvatt hann til að lifa lífinu til hins ítrasta með fötlun sinni og njóta hvers einasta dags. Stundum er lífsreynsla þó þess eðlis að aldrei verður fyllilega hægt að komast yfir hana, sama hversu jákvæður og sterkur einstaklingur er.

Sýningin byggir á viðtölum við Fúsa, sem Agnar Jón Egilsson frændi hans og leikstjóri sýningarinnar tók við hann á meðan covid faraldrinum stóð. Tilurð sýningarinnar er því samband frændanna Fúsa og Agga og samverustundir þeirra. Sýningin var unnin í samstarfi við sviðslistaframleiðandann Monochorme og MurMur Productions.

Listafólk

Leikarar: Sigfús Sveinbjörn Svanbergsson, Agnar Jón Egilsson, Vala Kristín Eiríksdóttir, Þórunn Arna Kristjánsdóttir og Egill Andrason. 
Leikstjóri: Agnar Jón Egilsson
Leikmynd og búningar: Svanhvít Thea Árnadóttir
Aðstoðarleikstjóri: Ástbjörg Rut Jónsdóttir
Tónlistarmaður: Egill Andrason
Aðstoð við söng: Gísli Magna
Framkvæmdastjórn: Davíð Freyr Þórunnarson fyrir MUR MUR Production.

Tilnefningar og verðlaun

Sýningin fékk Múrbrjótinn, viðurkenningu Landssamtakanna Þroskahjálpar árið 2024. Múrbrjóturinn er veittur þeim sem þykja hafa skarað framúr og brjóta niður múra í réttindamálum og viðhorfum til fatlaðs fólks og stuðla þannig að því að það fái tækifæri til að vera fullgildir þátttakendur í samfélaginu og til að lifa eðlilegu lífi til jafns við aðra. Í rökstuðningi kom fram að verkið hlyti m.a. viðurkenninguna á forsendum þess að verkið Fúsi, aldur og fyrri störf sé skrifað og leikið af leikara með þroskahömlun og að það sé í fyrsta skipti sem slíkt gerist í atvinnuleikhúsi á Íslandi.

Sýningin fékk einnig hvatningarverðlaun ÖBÍ árið 2024. Hvatningarverðlaunin eru veitt þeim sem hafa með verkum sínum stuðlað að einu samfélagi fyrir alla og endurspegla nútímalegar áherslur um þátttöku, sjálfstæði og jafnrétti fatlaðs fólks.

Fúsi, aldur og fyrri störf hlaut fjórar tilnefningar og tvö Grímuverðlaun árið 2024, leikstjóra ársins og Sprotann (hvatnigarverðlaun Grímunnar). En sýninginn fékk samtals fjórar tilnefningar til Grímunnar 2024, fyrrnefndar tvær ásamt Sýningu ársins og Leikara ársins í aukahlutverki (Agnar Jón). 

eftir Kolbrúnu Dögg Kristjánsdóttur

Stúlka ákveður að taka þátt í skólahlaupinu. Hún hleypur af stað. Hún er ein af sætu og vinsælu stelpunum og ætlar að verða leikkona þegar hún verður stór. Hún byrjar að dragast aftur úr. Bilið stækkar á milli hennar og hópsins. Stúlkan blæs sápukúlur og speglar sig í þeim. Sápukúlurnar svífa upp í himininn og brot úr lífshlaupi hennar birtast. Sögupersónan leiðir okkur í gegnum líf sitt sem manneskja með líkamlega skerðingu sem ágerist með aldrinum. Taktu flugið, beibí er saga um framtíðardrauma, ást, fjölskylduna, baráttu og sigra. Leikritið er byggt á persónulegri reynslu og lífshlaupi höfundarins, Kolbrúnar Daggar. Hún hefur lokið námi af sviðshöfundabraut LHÍ og meistaranámi í ritlist við HÍ, og er þetta fyrsta leikverk hennar sem sett er á svið í atvinnuleikhúsi. Verkið var frumsýnt 12. september 2024 á Litla sviði Þjóðleikhússins en leikstjórn var í höndum Ilmar Stefánsdóttur. Með Kolbrúnu léku í verkinu þau Þuríður Blær Jóhannsdóttir og Ernesto Camilo Aldazábal Valdés.

eftir Emblu Guðrúnar Ágústsdóttur og Nínu Hjálmarsdóttur

„Í okkar Eden er lykt af píku og nýslegnu grasi, og hrúga af hálfétnum eplum í horninu. Það er eitthvað skrítið við okkar Eden, eitthvað á ská, eitthvað óþægilegt. Adam & Eva eru ekki að leika hlutverkin sín eins og þau hafa alltaf gert.“

Embla Guðrúnar Ágústsdóttir og Nína Hjálmarsdóttir kafa ofan í sköpunarsöguna og taka sér pláss í sjálfum aldingarðinum upprunalega. Eden er hinsegin fötlunarparadís sem afmiðjar norm samfélagsins og leyfir áhorfendum að finna fyrir hinu erótíska innra með sér.

Embla Guðrúnar Ágústsdóttir er sjálfstætt starfandi fræðimaður, aktívisti og sviðslistakona sem hefur m.a. rannsakað kynverund og unað í lífi fatlaðs fólks. Fyrir frammistöðu sína í sýningunni Góða ferð inn í gömul sár var Embla tilnefnd til Grímuverðlaunanna sem dansari ársins 2023.

Nína Hjálmarsdóttir er sviðshöfundur, fræðimaður og menningarrýnir. Nína stofnaði leikhópinn Sálufélagar árið 2015 sem hafa framleitt ýmis verk fyrir svið, ásamt því að vera einn stofnandi og framleiðandi hinsegin klúbbakvöldanna Sleikur. Rannsóknir Nínu í listsköpun og fræðum eru á vettvangi afnýlenduvæðingar og hinsegin fræða í listum, sem oft staðsetja Ísland og Norðrið í nýlendusamhengi.

Listafólk

Höfundar & leikarar: Embla Guðrúnar Ágústsdóttir & Nína Hjálmarsdóttir
Dramatúrg: Gréta Kristín Ómarsdóttir
Danshöfundur: Rósa Ómarsdóttir
Framleiðandi: Davíð Freyr Þórunnarson, MurMur Productions
Sviðshönnuður: Tanja Huld Levý og Sean Patrick O'Brien
Tónskáld: Ronja Jóhannsdóttir

eftir Ásrúnu Magnúsdóttur

Dúettar voru frumsýndir á Listahátíð í Reykjavík 2024, þar sem stigu ólík pör sem tengdust persónulegum böndum stigu á svið. Tvö pör úr Dúettum munu koma fram, systkinin Arngunnur og Garðar Hinrikssbörn og vinirnir Ólafur Snævar Aðalsteinsson og Friðrik Agni Árnason. Þau munu ferðast með okkur á Vagninn á Flateyri og til fjarlægra zumba heima. 

Höfundur: Ásrún Magnúsdóttir
Hönnuður: Guðný Hrund Sigurðardóttir
Hljóð: Baldvin Þór Magnússon
Dansarar: Arngunnur Hinriksdóttir & Garðar Hinriksson, Ólafur Snævar Aðalsteinsson & Friðrik Agni Árnason.

eftir Láru Stefánsdóttur

Svartir fuglar er nýtt dansverk eftir Láru Stefánsdóttur spunnið út frá ljóðum Elísabetar Jökulsdóttur úr bókinni sem nefnist “Sjáðu, sjáðu mig, það er eina leiðin til að elska mig” og er samið sérstaklega fyrir Láru Þorsteinsdóttur dansara.

Öll ættu að geta tengt við ljóðin því flest leitast við á lífsleiðinni að tengjast sinni innri fegurð, sínum kjarna, sannleika en þurfa oftar en ekki að takast á við alls konar skuggahliðar og tilfinningaárásir í leitinni að ljósinu, gleðinni, ástinni og kærleikanum.

Dansverkið var frumsýnt á Listahátíðinni List án landamæra í október 2024 í samstarfi við Tjarnarbíó.

Danshöfundur: Lára Stefánsdóttir
Dansarar: Lára Þorsteinsdóttir, Íris Ásmundardóttir, Sigurður Edgar Andersen
Ljósa/tæknimaður: Arnar Ingvarsson
Samsetning/höfundur tónlistar: Stefán Franz Guðnason 
Upplestur: Elísabet Jökulsdóttir
Ljósmyndari: Christopher Lund 
 

Átak er félag fólks með þroskahömlun

Þér er boðið að koma og upplifa
tónlistarmyndband sem fólkið í Átaki gerði.

Þetta verður í fyrsta skipti sem myndbandið er sýnt!

Tónlistarmyndbandið heitir: Hjálpum þeim

Í Hjálpum þeim syngur
fólkið í Átaki
um hvernig fatlað fólk
hjálpar samfélaginu
að verða betra. 

Tónlistarmyndbandið
er unnið af fólkinu í Átaki,
með stuðningi frá vinum og samstarfsfélögum.

Komdu og upplifðu! 

Hjördís og Nóel

Flæði sem fer fram í samskiptum er margbreytilegt, 
bæði yrtum og óyrtum. 
Augu upplifa eðli samskipta með öðrum hætti en þeim ríkjandi samskiptamáta; raddmál. 
Eru töfrar í kjafti?