Að loknu fyrsta námsári geta nemendur sótt um að taka hluta af námi sínu við erlenda háskóla og á sama hátt eiga stúdentar frá erlendum háskólum kost á að taka hluta af námi sínu við deildina.
Umhverfis- og byggingarverkfræðideild er aðili að NORDTEK áætluninni um samstarf norrænna tækniháskóla og verkfræðideilda. NORDTEK heyrir undir NORDPLUS samstarfsáætlun Norðurlandaráðs og styrkir nemendur bæði í grunn- og framhaldsnámi í verkfræði til tímabundinnar námsdvalar við einhvern "systurskóla" á Norðurlöndum.
Verkfræðinemar HÍ hafa einnig aðgang að háskólum í Evrópu innan ramma ERASMUMS, SÓKRATES og LEONARDÓ áætlana Evrópusambandsins. ERASMUS og SÓKRATES bjóða nemendaskipti þar sem stúdentar eiga að geta flust á milli háskóla, án þess að það tefji þá í námi, en hin síðari gerir nemendum fært að sækja um sumarvinnu hjá erlendum fyrirtækjum, sem fá hluta launakostnaðar greiddan gegnum áætlunina.
Samnorrænir vísindastyrkir
Ýmsir kostir gefast á norrænum verkefna- og rannsóknastyrkjum. Fjölmargir möguleikar eru á að halda ráðstefnur og námskeið sem norrænar stofnanir eða sjóðir styrkja. Má þar m.a. nefna NorFa, Norræna rannsóknarráðið og styrki á vegum Norrænu ráðherranefndarinnar.
Formlegt tvíhliða samstarf Háskóla Íslands við ýmsa erlenda háskóla greiðir fyrir rannsóknarsamvinnu og auðveldar nemendum aðgang að framhaldsmenntun erlendis.
Má þar helsta nefna:
- DTU, tækniháskólann Danmörku, NTNU í Noregi, Chalmers í Svíþjóð, HTU í Finnlandi og aðra háskóla á Norðurlöndum
- Tækniháskólana í Karlsruhe, Berlín í Þýskalandi
- Tækniháskólann í Kaunas í Litháen
- University of Washington í Seattle, USA
- University of Minnesota, USA
- University of Florida í Miami, USA
- Cooper Union School of Engineering, New York, USA