Þrír nemendur hlutu hvatningarviðurkenningar á Nýsköpunarmóti Álklasans
Nýsköpunarmót Álklasans var haldið í sjöunda skipti í Hátíðarsal Háskóla Íslands fimmtudaginn 14. mars síðastliðinn. Mörg áhugaverð erindi voru á dagskrá sem snéru að framleiðsluferlum fortíðar og framtíðar, lausnum nýsköpunarfyrirtækja og þeim áskorunum sem ál- og kísiliðnaðurinn stendur frammi fyrir hér á landi sem og erlendis. Fundurinn var afar vel sóttur.
Sigurður Magnús Garðarsson, forseti Verkfræði- og náttúruvísindasviðs HÍ setti fundinn ásamt forseta verkfræðideildar Háskólans í Reykjavík, Ármanni Gylfasyni. Fyrsti flytjandi erindis var Dr. Espen Sandnes hjá NTNU í Þrándheimum en erindi hans fjallaði um rafgreiningu álkróðís, sem er leið til þess að framleiða ál án útblásturs koltvíoxíðs. Sunna Ólafsdóttir Wallevik, meðstofnandi Álvits, flutti síðan erindi um umhverfisvænar lausnir Álvits fyrir áliðnað og húðunariðnað, en mikil framþróun hefur átt sér stað hjá Álviti á síðustu árum.
Að loknu kaffihlé voru flutt stutt erindi.
Júlíus Brynjarsson, framkvæmdastjóri umbóta og ABS hjá Alcoa Fjarðaáli ræddi um daglega stjórnun Fjarðaáls, en í slíkum rekstri skipta góð kerfi sköpum fyrir starfsmenn, yfirmenn og framleiðsluna sjálfa.
Hans Atlason, stofnandi tölvusjónarfyrirtækisins Visk sagði frá þeirra starfsemi, en Visk hefur leyst ýmis vandamál fyrir Alcoa Fjarðaál með tölvusjón að vopni.
Bjarni Már Gylfason, leiðtogi samfélagsmála og samskipta hjá ÍSAL flutti erindi um sjálfbærni í álframleiðslu í ljósi nýrrar löggjafar.
Jón Hjaltalín Magnússon, stofnandi og framkvæmdastjóri Arctus Aluminium flutti erindi um álframleiðslu með lóðréttum eðalskautum, en það er framleiðsluaðferð sem hefur verið í þróun hér á landi sem myndi nánast útrýma kolefnislosun íslensks áliðnaðar.
Guðlaugur Bjarki Lúðvíksson, framkvæmdastjóriri Umhverfis-, öryggis og umbótasviðs Norðuráls ræddi um markmið Norðuráls í losun á koltvísýringi, en Norðurál hefur náð miklum árangri í lækkun kolefnisspors álframleiðslunnar á Grundartanga.
Að lokum sagði Guðrún Sævarsdóttir, prófessor við Háskólann í Reykjavík, frá framleiðslu kísils með rafgreiningu, en Guðrún hefur staðið fyrir ýmsum áhugaverðum rannsóknum á því sviði.
Hefð er fyrir því að veita nemendum hvatningarviðurkenningar fyrir verkefni á sviði ál- og kísiliðnaðar, en Álklasinn heldur einnig úti hugmyndagátt þar sem nemendur geta fengið hugmyndir að verkefnum og unnið þau með fyrirtækjum í klasanum. Þrjú verkefni fengu viðurkenningu í ár ásamt 150.000 króna styrk:
Guðlaug Geirsdóttir fékk viðurkenningu fyrir Mastersverkefni sitt í umhverfis- og auðlindafræði við Háskóla Íslands sem ber nafnið Greining viðskiptamódels koltvísýringsfyrirtækja. Í verkefni sínu kannaði og kortlagði Guðlaug mótvægisaðgerðir koltvísýringsfyrirtækja við losun og þær lausnir sem þau bjóða, en rannsóknin veitir gagnlegar upplýsingar um þeirra starfsemi og um leið innsýn í atvinnugreinina á Íslandi í heild.
Brandon Velasquez doktorsnemi við Háskólann í Reykjavík fékk viðurkenningu fyrir verkefni sitt Adaptation of Aluminum Reduction Cell for CSS þar sem hann þróaði hermunarlíkön af Hall-Héroult álframleiðsluferlinu til þess að kanna möguleikann á föngun á koltvísýringi frá álframleiðslu.
Að lokum fékk Mehdi Maghsoudi doktorsnemi við Háskóla Íslands viðurkenningu fyrir rannsóknir sínar hjá HÍ og nýsköpunarfyrirtækinu DTE, en verkefni hans er titlað sem Mapping Binary and Ternary Phase Diagrams Using Laser-Induced Breakdown Spectroscopy of Liquid Metal. Í rannsóknum sínum hefur Mehdi unnið að því að betrumbæta tækni DTE sem framleiðir efnisgreiningarbúnað fyrir málmiðnaðinn.
Styrktaraðilar hvatningarviðurkenninganna í ár eru Alcoa Fjarðaál, COWI, Landsbankinn, Launafl, Norðurál, Rio Tinto á Íslandi, Samál, Samtök Iðnaðarins, Tæknisetur og Eurometal.
