Þrjár bækur fræðafólks við HÍ tilnefndar til viðurkenningar Hagþenkis

Þrjár bækur fræðafólks við Háskóla Íslands hafa verið tilnefndar til viðurkenningar Hagþenkis fyrir útgáfuárið 2022 en hún er veitt árlega fyrir fræðirit, kennslugögn eða aðra miðlun fræðilegs efnis eða rannsókna. Tvær bókanna koma út á vegum Háskólaútgáfunnar. 

Tilnefningar til viðurkenningarinnar voru kynntar miðvikudaginn 8. febrúar í Borgarbókasafni Reykjavíkur í Grófinni. Fræðafólk við Háskóla Íslands var tilnefnt að þessu sinni fyrir eftirfarandi bækur:  

• Ástríður Stefánsdóttir dósent og prófessorarnir Guðrún V. Stefánsdóttir og Kristín Björnsdóttir, sem allar starfa á Menntavísindasviði, eru ritstjórar bókarinnar Aðstæðubundið sjálfræði. Líf og aðstæður fólks með þroskahömlun. Háskólaútgáfan gefur út.

„Hagnýtt fræðirit um þann einfalda en oft hunsaða sannleik að allir þjóðfélagsþegnar eigi að njóta grundvallarmannréttinda. Tímamótaverk,“ segir í umsögn viðurkenningarráðs Hagþenkis um bókina.

• Helgi Þorláksson, professor emeritus í sagnfræði, fyrir bókina Á sögustöðum. Bessastaðir, Skálholt, Oddi, Reykholt, Hólar, Þingvellir. Vaka-Helgafell gefur út.

„Mikilvæg bók sem teflir niðurstöðum nýlegra rannsókna fram gegn hefðbundinni sýn á sögustaði,“ segir í umsögn viðurkenningarráðs.

• Stefán Ólafsson, prófessor emeritus í félagsfræði, fyrir bókina Baráttan um bjargirnar. Stjórnmál og stéttabarátta í mótun íslensks samfélags. Háskólaútgáfan gefur út.

„Víðtæk og vel skrifuð þjóðfélagsfræðileg greining á þróun lífskjara og samfélagsgerðar á Íslandi,“ segir í umsögn viðurkenningaráðs.

Allar tilnefningar til viðurkenninga Hagþenkis má nálgast á vef félagsins.

Viðurkenning Hagþenkis verður veitt við hátíðlega athöfn um miðjan mars en hún felst í sérstöku viðurkenningarskjali og 1.250.000 kr.