Fyrirlestur Sagnfræðistofnunar: Sergey Radchenko

Sergey Radchenko, prófessor við Johns Hopkins Háskóla í Bandaríkjunum, heldur opinn fyrirlestur á vegum Sagnfræðistofnunar Háskóla Íslands um bók sína To Run the World: the Kremlin’s Cold War Bid for Global Power sem kom út á síðasta ári.

Fyrirlesturinn fer fram í stofu 303 í Árnagarði föstudaginn 14. mars kl. 13:00-14:00. Verið öll velkomin.

Um fyrirlesarann

Sergey Radchenko er Wilson E. Schmidt prófessor við Johns Hopkins háskóla í Bandaríkjunum. Hann hefur í rannsóknum sínum skrifað um kalda stríðið, kjarnorkusögu og utanríkis- og öryggisstefnu Rússa og Kínverja. Hann hefur einnig starfað við Woodrow Wilson Center í Washington DC og East China Normal University í Shanghai. Bækur hans eru meðal annars To Run the World: the Kremlin’s Cold War Bid for Global Power (Cambridge UP, 2024), Two Suns in the Heavens: the Sino-Soviet Struggle for Supremacy (Wilson Center Press & Stanford UP, 2009), and Unwanted Visionaries: the Soviet Failure in Asia (Oxford UP, 2014) en að auki hefur Sergey Radchenko skrifað fjölmargar greinar í tímarit og dagblöð, þ.á.m. Foreign Affairs og New York Times.

Sergey Radchenko er fæddur á Sakhalin-eyju í Rússlandi og menntaður í Bandaríkjunum, Hong Kong og Bretlandi. Hann lauk doktorsprófi í alþjóðasagnfræði frá London School of Economics árið 2005. Áður en hann gekk til liðs við alþjóðamálastofnun Johns Hopkins háskóla vann Sergey Radchenko í Mongólíu, Kína og Wales.